БИШКЕК, 19-авг. — Sputnik. Жер ортолук деңиз аркылуу Европага кетип бара жаткан беш мигранттын сөөгү Сицилия куймасынан табылды деп кабарлады РИА Новости.
Өткөн суткада жүргүзүлгөн издөө операциясы учурунда Италиянын жээктеги ыкчам аракетке келген коргоо кызматы 534 качкынды сактап калды. Бозгундар Италиянын жээгине үйлөмө эки кайыктын жана анча чоң эмес парустуу кайыктын жардамы менен жеткенге аракет кылган. Куткаруу операцияларына Италия менен Германиянын Аскер деңиз күчтөрү жана бейөкмөттүк бир катар уюмдар катышкан.
Миграция боюнча эл аралык уюм тараткан статистикага таянсак, былтыр 5,4 миң мигрант каза таап же жоголгон. Быйыл Европага сапар алган ар бир качкындын 25-си каза тапты. Кайгылуу окуянын 80 пайызы Жер ортолук деңизинде болууда.
