БИШКЕК, 12-авг. — Sputnik. Бишкекте ишембиге караган түнү асманда булут азыраак болот деп билдирди Sputnik Кыргызстан агенттигине Кыргызгидрометтен.
Буга чейин 12синен 13үнө караган түнү планетанын жашоочулары жылдыз жааган түнгө күбө болуп, тагыраагы, Жер Свифта-Туттля кометасынын чаңдуу изине түшөөрү кабарланган. Окумуштуулар саатына 200гө чукул жылдыздын учаары күтүлүп жатканын айтышты.
"Түндө асман ачык болот, эгер каптаса да азыраак кездешет",— деп билдирди Кыргызгидромет.
Анткен менен тоо этектериндеги райондор менен тоолордо асманды ала булут каптайт.
"Нарын менен Ысык-Көл облусун ала булут капташы мүмкүн", — деп билдиришти синоптиктер.
Учкан жылдыздар — планеталар арасындагы анча чоң эмес бөлүкчөлөр, булардын көлөмү кумдан тарта буурчакка чейин болот. Алар жердин атмосферасына кирип секундасына 20 чакырым ылдамдыкта учуп, тез эле күйүп кетишет. Бул алыстан караганда абдан кооз көрүнөт.
Ал эми эл арасында асманда жылдыз учканда калоо-тилегиңди айтып жетишип калсаң аткарылат деген ишеним айтылып келет.
