Айрымдары эле буйрутма болбосо саймачы таасирдүү адамдардын портреттерин өз каалоосу менен жасайт экен. Журналист Гүлдана Талантбекованын саймачы мырзанын жашоосуна жана эмне үчүн бул өнөрдү аркалап жатканына кызыгып көрдү.
— Сайма менен канча убакыттан бери алектенип келесиз?
— Мен өзүм сүрөтчүмүн. Борбордогу Чуйков окуу жайын бүткөндөн кийин 1983-жылдары Ак-Талааага келип Маданият үйүндө иштеп калдым. Ошондо жалаң эле боек, карандаш, сүрөтчүгө эмне ылайыктуу болсо, ошолор менен иштеп жүргөм. Аймактык беш сүрөтчү биригип алып иштедик. Убакыт өтө берди, сүрөттү сатып алганга элде деле акча жок болгондуктан эмерек жасай баштадым. Сандыктан бери жасачубуз. Тактай тилип жатканда оң колумдун аты жогу менен чыпалагын алдырып алдым.
Акаевдин учурунда бул жактагылар герб, желек сайып бериңиз деп айтып калышты. Мен сүрөтүн чийип бердим, колуктум ага сайма түшүрөт. Туура эмес сайылып калса, экөөбүз таарынышып калабыз. Анан байбичеме "берчи, мындан кийин өзүм эле саяйынчы" деп айттым. Ошондон тарта өзүм саям, үйдөн колуктум, кыздарым, келиндерим да кем калышпай сайма сайышат.
— Бул саймалардын түрүн ким ойлоп тапкан?
— Бул аракетиңизди жакындарыңыз кандай кабыл алды?
— Жакындарды кой, башында өзүм эркек башым менен сайма сайганымдан уялып жүрдүм. Эл аялдын жумушун жасап жатат дейт го деп үйгө киши келсе жашынып калчумун. Кийинчерээк эле кенен отуруп сайып калдым.
— Бул сайманы ар бир эле адам үйрөнө алабы, же өзгөчө бир шык-жөндөм керекпи?
— Албетте талант, идирек керек. Биринчи чыдамкайлык, анан талыкпаган эмгек зарыл.
— Сизге келип өнөр үйрөнөм дегендерге көз карашыңыз кандай. Ушундай сунуштар менен кайрылгандар болобу?
— Көз карашым ырас эле. Келип үйрөнүшсө жакшы болот эле. Менде ичи тарлык деген жок. Кудайдын буюрганы да. Өткөндө бир жигит телефонумду алып, мага жолугат элем дептир. Келем дегендерге үйрөтөм.
— Бул саймага эмнелер керектелет?
— Илгери түстүү жиптерди алыш үчүн ар кайсы кийимди чубап, жандырып алчубуз. Азыр жиптин каалаган өңүн тапса болот. Адатта төрт, беш жипти бир саптап алып саям. Шибеге сыяктуу сайгычтын учу кадимки мал доктурдун ийнесинен жасалган. Материал керектелет. Чекесиндеги жыгачтарын өзүм жасайм.
— Учурда үй-бүлөңүздү сайма менен багып жатасыз десем жаңылышпаймбы?
— Ооба, албетте. Буйрутмаларга жараша татаал портрет, картиналарды саймага түшүрөм. Колуктум майда-чүйдө кооз сүрөттөрдү саят. Андан сырткары кыздарыма, келиндериме да үйрөткөм. Бирок аларга сүрөтүн мен чийип берем. Жогоруда айтып кеткендей бул өнөр сүрөтчүлүктү да талап кылат.
