Дүрбөлөңгө түшкөн түрк басылмалары. Кыргызстандын президенти Алмазбек Атамбаев түрк министринин "Кыргызстанда да төңкөрүш болушу мүмкүн" деген билдирүүсүнө "бизди коркутуп, акыл үйрөтүүнүн кажети жок" деп түшүндүрмө берген. Атамбаевдин бул билдирүүсүн түрк басылмалары түрдүүчө жазып, өзүнчө эле "айгай" салып жатып калышты. Сыягы түрк туугандар Атамбаевден мындай жоопту күтпөгөн окшойт. Кыргызстан эгемендүү өлкө экенин башкалардын эсине да бир жолу салып койсок ашыкча болбойт.
Баткендин балдары дүйнөгө дүң болду. Instagram социалдык тармагынын расмий аккаунту өзүнүн баракчасына жаш сүрөтчү Эльер Нематовдун Баткендин Исфана шаарынан тартып алган сүрөтүн жайгаштырды. Саналуу сааттар ичинде миллионго жакын "лайк" чогулткан сүрөттө эки кичинекей баланын колго жасалган көпүрөдөн өтүп жаткан учуру тартылып алынган. Алар шаша-буша көпүрөдөн өтүп, бала бакчадагы коштошуу кечесине баратканын айтышты. Бул сүрөттү көрүп, ар бирибиздин айылда өткөн күндөрүбүз бир жолу көз алдыбызга тартылды окшойт.
Зарыл ишиң болбосо, Зардалыда эмне бар. Бул сөздү такай укканыбыз менен Баткенде болбогондор анын маанисин деле түшүнбөсөк керек. Анткени Зардалы жердин түбү экенин ошол жакта жашагандар аябай жакшы билишкендей. Мына ошол тоо арасында, чек арага жакын жайгашкан айылга барчу бир нече көпүрөнү сел алып кетип, айыл тургундары байланышсыз калды. Жөө-жалаңдап, кемпир-чалдар эшек минип эптеп оокат кылып жатканын бул жактан көрүңүз. Сел алган көпүрөлөр жакын арада оңдолуп, айыл эли мурдагыдай каттап калат деп тилек кылалы.
Мандаты жоголбойт. Бир нече күндөн бери социалдык тармакта, эки кишинин башы бириккен жерде эле Конституцияга киргизиле турчу өзгөртүү жөнүндө кеп болуп жатат. Референдум аркылуу киргизиле турчу айрым түзөтүүлөр боюнча депутат болуп шайланып, бирок өкмөт башчы же вице-премьер-министр болуп кеткен депутаттардын орду сакталат экен, эй. Кийин өкмөт башчылыктан ыргыгандар кайта депутат болуп бакыйып отуруп калат экен. Эмне дейбиз, орун майлуу-сүттүү болсун…
Башканы эмес, өзүбүздүн таламды талашкандар керек. Түркиядагы окуялардан кийин Кыргызстанда билим берип жаткан чет элдик окуу мекемелерин тыкыр текшерүү керектигин айрымдар айтып чыгышты.
Саясат таануучу Марс Сариев Кыргызстандагы түрдүү билим берүү мекемелерин аяктагандар кайсыл мамлекет тарабынан каржыланган окуу жайды бүтсө, кийин ошонун таламын талашып калат деген коркунуч бар экенин айтты.
"Кыргызстандагы түрк окуу жайларын аяктагандар Түркияга, Американын университетин аяктагандар АКШга жана батышка, Кыргызстан — Россия Славян университетин аяктагандар Россияга ыктап, келечекте коомдо пикир келишпестиктер болушу ыктымал. Андыктан Кыргызстандын баалуулуктарын көздөгөн мектептерди, окуу жайларды ачуу керек", — дейт ал.
Валюта баасы. Аз-аздап көтөрүлүп отуруп бүгүн бир доллар орто эсеп менен 68,10 сом деп бааланды.
Мунай баасы. Бишкекте Аи-95 үлгүсүндөгү бензин 38 сом, Аи-92 үлгүсүндөгү май 35 сом, ал эми дизель майы 30 сом 50 тыйындан сатылууда.
Соңку сөз ордуна. Өзүңдү эр ойлосоң, башканы шер ойло.
Агарып аткан таңда амандашып, Расул Үсөналиев.
