Оң колуң менен берген жардамды сол колуң көрбөсүн деген жакшы сөз бар. Бул сөздү кечээ өлкө башчысы дагы бир жолу бышыктады окшойт.
Жардам берсе, милдет кылбасын. Өлкө башчысы агынан жарылып, Түркия милдет кыла турган болсо, берген акчаларын алып кетсин деп айтты. Президент Атамбаев мындай пикирин Чолпон-Атадагы маалымат жыйыны учурунда билдирди. Белгилей кетсек, буга чейин Түркиянын тышкы иштер министри Мевлүт Чавушоглу Кыргызстанда Фетхуллах Гүлендин тарапташтары төңкөрүш кылат, абайлагыла, аларды өлкөдөн чыгаргыла деген таризде сес көрсөткөн эле.
Жогорку Кеңеш тарабайт, референдум өтөт. Кечээ күнкү негизги жаңылыктар өлкө башчысы Атамбаевдин айткандары болду. Ал эмнеси болсо да референдум өткөрө турганын, бирок ошол эле учурда Жогорку Кеңешти таркатууга негиз жок экенин айтты. 25 жыл ичинде төрт президентти алмаштырган Кыргызстанда Конституцияга тийишкенде эле бир балакет болчу эле. Үмүтсүз шайтан дейт, жаман жоруктарды эстебей, бул ишти жакшылыкка жоруй туралы.
Көчмөндөр оюну европалыктарды чакырат. Көчмөндөр оюндарына саналуу күндөр калды. Ага болгон кызыгуу учурда күч. Бул кызыгууну дагы арттыруу үчүн Euronews телеканалы II Дүйнөлүк көчмөндөр оюндарынын проморолигин көрсөтө турган болду. Көчмөндөрдүн маданиятын, сал-санаасын, дүйнө таанымын Европага чейин жайылтуу аракеттери берекелүү болсун.
Балбан кыздын катылган таланты. Учурдун кыргыздын "Кыз Сайкалы" деп тартынбай айта ала турган кыздарыбыздын көч башында Айсулуу Тыныбекова турат десек, эч ким талашпайт болуш керек. 23 жаштагы балбан Кыргызстандын атын далайга таанытып, намыска жарап келет. Балбан десе эле бука моюн, буура сан спортчуларды элестетебиз. Айсулуу бир гана каруусуна ишенбей, колуна калем кармап ыр жазып, ажайып кооз сүрөттөрдү тартып коет экен. Өркүнүң өссүн. Рио олимпиадасында ийгилик каалайбыз. Алга Айсулуу, алга Кыргызстан!
Ахмад Кадыровдун портрети. Кыргызстандын жаш активисттердин бири Азамат Жаналиев жип менен мык колдонуп, Чечен республикасынын мурдагы президенти Ахмад Кадыровдун портретин тартты. Аны 23-августта баласы Рамзан Кадыровго белек кылып тартуулайт. Себеби дал ушул күнү Ахмад Кадыровдун туулган күнү экен. Волесипед жана жол тосуп жыйырма күндө Грозный шаарына жетем деген Азамат бүгүн жолго чыкты.
Валюта баасы. Бүгүн бир доллар орто эсеп менен 68,18 сом деп бааланды.
Мунай баасы. Бишкекте Аи-95 үлгүсүндөгү бензин 38 сом, Аи-92 үлгүсүндөгү май 35 сом, ал эми дизель майы 30 сом 50 тыйындан сатылууда.
Соңку сөз ордуна. Уурусу күчтүү болсо, ээсин доого жыгат.
Мага эмне кылып койду эле дебей, мен эмне кылып жатам деп ойлонсок. Жакшы тилегим менен Расул Үсөналиев.
