БИШКЕК, 30-июл. — Sputnik. №32 жол тейлөө кызматынын башкы инженери Жагуза Султаналиев жол салганда тоонун катмары козголуп калгандыктан Боомдо улам таш түшүп жатканын Sputnik Кыргызстан агенттигине билдирди.
Анын айтымында Бишкек — Нарын — Торугарт жолу оңдолгонго чейин таш кулоо фактылары дээрлик катталган эмес.
"Мурда таш түшчү эмес. Кийин жол кеңейтилип курулганда тоонун бети алынып, катмары козголуп калган. Учурда ӨКМ кызматкерлери окуя болгон жерге келишип, мындай кырсыктарды алдын алуу үчүн кандай чараларды көрүү керектигин айта албай жатышат", — дейт Султаналиев.
Ал билдиргендей мындай таш кулоо быйылкы жыл ичинде биринчи жолу болуп жаткан жок.
"Бүгүн түндөгү таш кулоо бир адамдын өмүрүн алды. Кырсык 131-чакырымда болду. Былтыр август айында так ушул чакырымга кум шагыл түшүп аны 6-7 саатта араң тазалап бүткөнбүз. Бүгүн түнкүсүн азырак түшкөндүгүнө байланыштуу жолду бир саат ичинде эле тазаладык", — деп белгиледи Султаналиев.
Башкы инженер жолго таш кулоо ыктымалдыгы болгондуктан учурда Боом капчыгайында атайын техникалар нөөмөттө тургандыгын кошумчалады. Ал эми ары-бери өткөн автоунаалар каттамын токтотушкан жок.
