БИШКЕК, 30-июл. — Sputnik. Боом капчыгайынан автоунаага таш кулап, бир киши каза болгонун ӨКМ билдирди.
Маалыматка ылайык, кырсык 30-июлда саат 03:20 чамасында Бишкек — Нарын — Торугарт унаа жолунун 142-143-чакырымында болгон. Кулаган таш Honda Stepwgn үлгүсүндөгү машинанын үстүнө түшкөн.
"Анын кесепетинен бир жүргүнчү каза болуп, унаанын айдоочусу жаракат алган. Каза болгон жана жабыркаган адамдар жолдон өтүп бараткан машиналар менен 124-чакырымдагы медициналык пунктуна жеткирилген", — деп айтылат маалыматта.
Автоунаанын ичинде 11 адам болгон.
Кырсык болгон аймакка Кемин райондук №32 жол тейлөө ишканасынан 1 жүктөгүч тартылып, унаа жолго түшкөн майда таштар толук тазаланган.
Белгилей кетсек, буга чейин да Боом капчыгайын сел суулары каптап, автоунаалардын өтүүсүнө тоскоолдук жараткан.
