БИШКЕК, 19-июл. — Sputnik. Балыкчы шаарындагы "Кыргызмунай" нефтибазасында өрт чыкканын ӨКМдин Ысык-Көл облусу боюнча башкармалыгы билдирди.
Маалыматка ылайык, өрт бүгүн эртең менен саат 9:00дөр чамасында чыккан.
"Нефтибазасынын насостук объектисинде электрдик чыңалуудан улам өрт чыккан. Аны ӨКМдин кызматкерлери бат эле көбүк чачып өчүрүштү", — деп башкармалык билдирди.
Алдын ала маалыматтарга ылайык, нефтибазасынын насостук объектисиндеги зымдар суу болуп, аны иштеткенде чыңалуу пайда болгон.
Белгилей кетсек, кечээ 18-июлда Балыкчы шаарында мөндүр аралаш катуу жамгыр жааган. Анын кесепетинен сел жүрүп, ал айрым үйлөрдү жана имараттарды каптаган. Короосуна толгон сууну тазалап жатып, бир аял эси ооп каза болгон.
