БИШКЕК, 12-июл. — Sputnik. Алмазбек Атамбаев Испаниянын, Жаңы Зеландиянын, Судандын, Тажикстандын, Таиланддын атайын жана ыйгарым укуктуу элчилеринен ишеним грамоталарын кабыл алды. Бул тууралуу президенттин маалымат кызматы маалымдады.
Салтанатта президент элчилердин ишинин натыйжалары өлкөлөр ортосундагы мамилелердин өнүгүшүнө өбөлгө болоруна ишеним билдирди.
Президент Кыргызстан менен алыскы мамлекет экенине карабастан, күчтүү жана өнүккөн өлкө Жаңы Зеландиянын ортосундагы кызматташуунун активдүү болоруна ниеттене турганын айтты.
"Айыл чарбасында жана башка тармактарда биз силерден көп нерсени үйрөнсөк болот", — деди Атамбаев.
Кыргыз-испан мамилелерине токтолгон мамлекет башчысы бул өлкөдөн үйрөнө турчу жайгдайлар бадыгын белгиледи.
"Өткөн жылы Барселонанын вице-мэри Энтони Вивес Томас жумушчу сапар менен келип кетти. Испания Бишкектин Смарт Сити болушуна көмөктөшөт деп ойлойм", — деген үмүтүн өлкө башчысы айтты.
Төмөндөгү элчилер президентке ишеним грамотасын тапшырды:
- Педро Хосе Санc Серрано — Испания Королдугунун Кыргызстандагы элчиси;
- Иэн Александр Хилл – Жаңы Зеландиянын Кыргызстандагы атайын жана ыйгарым укуктуу элчиси;
- Мохаммед Илиас Мохаммед Аль-Хак – Судандын Кыргызстандагы атайын жана ыйгарым укуктуу элчиси;
- Олимзода Сухроб Ходжа – Тажикстандын Кыргызстандагы атайын жана ыйгарым укуктуу элчиси;
- Нат Пинёваттаначип – Таиланд Королдугунун Кыргызстандагы атайын жана ыйгарым укуктуу элчиси.
