БИШКЕК, 11-июл. — Sputnik. Өнөр жай, энергетика жана жер казынасын пайдалануу боюнча мамлекеттик комитеттин төрагасы Дүйшөнбек Зилалиев электр энергия ишканалары келе жаткан жылга карата жылытуу сезонунда кемчилик кетирсе, жетекчилери керт башы менен жооп бере тургандыгын айтты. Бул тууралуу аталган комитеттин маалымат кызматы билдирди.
Бишкек шаарындагы жана аймактардагы электр энергиясы боюнча иш алып барган ишканалардын жетекчилери катышкан жыйында 15-октябрга чейин жылытуу боюнча бардык даярдык иштерин бүтүү тапшырылды.
Зилалиев жылытуу сезону учурунда кетирилген кемчиликтер үчүн ар бир жетекчи керт башы менен жооп бере турганын айтты.
"Зилалиев коррупциялык аракеттердин алдын алуу, колдонулган электр энергиясы үчүн төлөмдү толук чогултуу, акылдуу эсептегичтерди орнотуу боюнча аймактардагы иштерди ылдамдатууну тапшырды. Ал учурда акылдуу эсептегичтерди орнотуу боюнча жүрүп жаткан иштердин темпине канааттанбай турганын айтты", — деп жазылат маалыматта.
Комитет жетекчиси тендерди өткөрүүдө документацияга так болууга, тендердик комиссиянын курамынын сапатына да көңүл бурууга чакырган. Себеби, 2016-жылдын январынан май айына чейин "Түндүкэлектр" ишканасы 96 тендер өткөрүүгө камданса, анын 58и болбой калган.
