БИШКЕК, 25-июн. — Sputnik. Мамлекеттик органдардын маалымат катчылары менен журналисттер Ысык-Көл облусунда өз ара иштешүүдөгү талаш жараткан маселелерди талкуулашты. Иш-чара Бает айылында өтүүдө.
Медиа адис Елена Баялинова журналисттер менен маалымат катчылардын өз ара майнаптуу иштешүүсү сапаттуу маалыматтын негизи экендигин айтты. Анын айтымында, адамдардын мекеменин ишмердүүлүгүнө ишеними жаралышы керек.
Семинар учурунда катышкандар күнүмдүк иш процессинде эки тараптын талаштуу жагдайларын талкуулады.
Катышуучулардын көп суроосун жараткан маалыматтардын мамлекеттик тилде берилбеши, тармактар боюнча адистер тобунун жоктугу сыяктуу суроолор болду. Андан сырткары, ведомство ичинде маалымат катчылардын статусун көтөрүү, сенсациянын артынан ээрчип, негативдүү маалыматтарды берүү жагдайларын талкуулашты.
Жалпыга маалымдоо каражаттары, маалымат катчылары жана ПРООНдун ортосунда өз ара кызматташуунун механизмдерин жакшыртуу жолдорун иштеп чыгуу — жолугушуунун негизги жыйынтыгынын бири болду.
