БИШКЕК, 22-июн. — Sputnik. Эртең, 23-июнда Кыргызстандын айрым аймактарында кар жаап, катуу шамал болорун Кыргызгидромет билдирди.
Маалыматка ылайык, Кыргызстандын көпчүлүк аймактарында жаан жаап, бийик тоолуу аймактарында кар жаайт. Батыштан соккон шамалдын ылдамдыгы секундасына 4-9 метрден, кээ бир райондордо 17-22 метрге чейин жетет.
Бишкекте мезгил-мезгили менен жаан жаап, күн күркүрөп, абанын температурасы 25 градуска чейин ысыйт. Ал эми Ош шаарында күндүз 31 градуска чейин көтөрүлөт.
22-июнда абанын температурасы көпчүлүк аймактарда төмөндөп, жайыттарда түнкүсүн 2 градуска чейин суук болот.
Мындай туруксуз аба ырайы айыл чарба иштерин, автоунаа, энергетика жана коммуналдык кызматтардын ишин жана жайыттарда малды кармоону кыйындатат.
23-24-июнда күтүлүп жаткан нөшөрлүү жаанга байланыштуу республиканын тоолуу жана тоо этектериндеги райондордо сел жүрүшү мүмкүн.
Ал эми дем алыш — ишемби жана жекшемби күндөрү өлкө аймагында жаан жаабай, ала булут каптап турат.
