БИШКЕК, 20-июн. — Sputnik. Республикада үстүбүздөгү жылдын 21-июнунан 24-июнуна чейин туруксуз аба ырайы боло турганын ӨКМ билдирди.
Маалыматка ылайык, 21-июнда эртең менен жана күндүз Чүй, Талас, Ысык-Көл облустарынын көпчүлүк аймактарында жаан жаап, күн күркүрөйт. Айрым жерлерде нөшөрлүү жамгыр божомолдонууда. Ош, Жалал-Абад, Баткен, Нарын облустарында жаан-чачын кээ бир райондордо күтүлөт.
22-июнда көпчүлүк аймактарда күн күркүрөп, айрым жерлерде катуу жаан-чачын болушу күтүлүп жатат. Кээ бир райондордо шамалдын ылдамдыгы секундасына 17-22 метрге чейин жетет. 21-22-июнда абанын температурасы көпчүлүк аймактарда төмөндөп, жайыттарда түнкүсүн 2…3 градус жылуу болсо, күндүз 7…12 градуска чейин көтөрүлөт.
ӨКМ мындай туруксуз аба ырайы айыл чарба иштерин, автоунаа, энергетика жана коммуналдык кызматтардын ишин жана жайыттарда малды кармоону кыйындатарын эскертет.
Мындан тышкары, нөшөрлүү жаан-чачындан улам республиканын тоолуу жана тоо этектериндеги райондорунда сел жүрүү коркунучу сакталат, дарыяларда суунун деңгээли көтөрүлөрүн белгилейт.
