БИШКЕК, 22-июн. — Sputnik. Кыргыз элинин таланттуу акыны Турар Кожомбердиев көзү тирүү болгондо бүгүн 75 жашка чыгат эле. Бул зор таланттын ыр китептери акыркы ондогон жылдардан бери кайталап басыла элек. Ал эми совет учурунда чыккан китептери көзгө сүрткөн тумар сымал сейрек кездешип, ал тургай китепканалардан табуу кыйынга турат.
Кожомбердиевдин балдарга арнаган ырлары тарбиялык мааниси өтө зор жана пайдалуу экенин ар бир ыр күйөрмандарына белгилүү. Көпчүлүк балдардын суроосу менен 1977-жылы "Көлчүктөгү ай" экинчи жолу басылып чыккан экен.
Акындын кызы Нургүл Кожомбердиева бул боштукту толтурууга аракет кылып, атасынын китептерин кайрадан бастыруу үчүн чуркап жүргөнүн эшитип, аны кепке тарттык.
"Өзүңүздөр билесиздер, дүкөндөрдө кыргыз тилинде бөбөктөргө үчүн сапаттуу китептер жокко эсе. Атамдын чыгармаларынын арасынан эң алгачкы "Көлчүктөгү ай" китебин анын 75 жылдык мааракесине карата балдарга тартуулоо азыркы мезгилдин талабы деп ойлоп, бастырып жатабыз",— деди Нургүл Кожомбердиева.
Ал "Көлчүктөгү ай" тогуз сериядан турган 24 барактуу китепче болуп чыгаарын кошумчалады.
"Акынды 30-35 жаштагылардын көбү азыр билбей калыптыр. Биз айтпасак, коомчулукка таратпасак, алар кайдан билет. Ошондуктан 75 жылдык юбилейге арналган иш-чараны китебин чыгаруудан баштайлы дедик", — деп айтты ал.
Нургүл Кожомбердиева китептерден сырткары акындын кичи мекени Сары-Булак айылындагы өзү чоңойгон үйдү калыбына келтирип, үй-музейге айлантууга ниеттенип жатканын билдик.
Бүгүн акын өзү жарык дүйнөгө келген Сары-Булак айылында эскерилип жатат. Жыл сайын анын элесине арналып веложарыш өткөрүлөт. Акындын атын алып жүргөн мектепти бүтүрүүчүлөргө аттестат тапшыруу аземи жана аны эскерүү кечеси болот.
Турар Кожомбердиев Калинин районундагы Сары-Булак кыштагында 1941-жылы туулуп, 1989-жылы 48 жашында каза болгон.
