БИШКЕК, 20-июн. — Sputnik. Президент Алмазбек Атамбаев Өзбекстандын Ташкент шаарында өтө турган Шанхай кызматташтык уюмунун (ШКУ) саммитине катышат. Бул тууралуу өлкө башчынын маалымат кызматы билдирди.
Маалыматка ылайык, саммит 23-24-июнга белгиленген.
Өзбекстанга болчу иш сапар маселеси үстүбүздөгү жылдын март айында кыргыз-өзбек чек арасындагы жагдайдан улам өлкө башчынын аталган жыйынга барбай калышы мүмкүн экенин айткандан кийин жаралган.
Жооп иретинде Кыргызстан да эки БТР менен 40ка чукул аскерлерин койгон. Ошол эле күнү Тышкы иштер министрлиги Өзбекстандын Кыргызстандагы элчисине чек араны ачуу талабы менен каршылык нотасын тапшырган.
Эки тараптуу сүйлөшүүлөрдүн натыйжасында аскерлердин саны кыскартылып, эки өлкөдөн сегизден жоокер кайтарып калган.
22-март күнү Кыргызстандын демилгеси менен ЖККУ кеңешке чогулуп, чек арадагы абал менен деринен таанышуу үчүн башкы катчынын орун басары Ара Бадалян Бишкекке жөнөтүлгөн.
Кыргыз тарап такталбаган "Чаласарт" чек ара аймагына өзбек тарап тосмолорду коюуга, куралдуу күчтөрүн жана аскердик техникасын киргизүүгө укугу жок экенин дагы бир ирет кайталап, Өзбекстан менен конструктивдүү сүйлөшүүгө даяр экенин айткан. Тийиштүү нота ошол эле күнү жиберилген.
Мындан улам, Атамбаев Бишкек шаарындагы сквер түшчү аймак менен таанышып жатып, журналисттерге ШКУ жыйынына барбай калышы мүмкүн экенин айткан.
