БИШКЕК, 17-июн. — Sputnik. Өкмөт башчы Сооронбай Жээнбеков бүгүн, 17-июнда транспорт жана коммуникация министри Замирбек Айдаровду кабыл алып, депутат Дастан Жумабеков көтөргөн тендер маселеси боюнча маалымат алды. Бул тууралуу өкмөт башчынын маалымат кызматы билдирди.
Ал билдиргендей, аталган тендерде 70 миллион долларга билдирме берген "China Railway" кытайлык компаниясы жеңип чыккан, ошол эле учурда 54 миллион долларга иш аткарууну сунуштаган "Kocoglu Insaat Sanayi Tarim ve Hayvancilik Ticaret A.S." түрк компаниясы утулуп калган.
"Транспорт жана коммуникация министри Замирбек Айдаров Бишкек – Кара-Балта жолун реконструкциялоого тендердин өткөрүлүшү боюнча тактоо киргизди. Ал белгилегендей, 2016-жылдын 15-июнунда тендердик комиссия тарабынан талапкерлердин финансылык сунуштары ачылып, бүгүнкү күндө жеңүүчү аныктала элек", — деп айтылат маалыматта.
Тендер 2015-жылдын 15-декабрында жарыяланып, документтерди берүү мөөнөтү 2016-жылдын 9-февралына белгиленген. Ага катышууга 16 компания арыз берген.
Азия Өнүктүрүү Банкынын арыз берген компаниялар боюнча каты 2016-жылдын 10-июнунда келген. Анда тендерге катышкан 16 компаниянын алтоосу Азия Өнүктүрүү банкынын талаптарына жооп берген эмес, дагы бирөө алардын кара тизмесинде болуп чыккан. Калган тогуз компаниянын арызы кабыл алынган.
"54 миллион доллар сунуштаган "Kocoglu Insaat Sanayi Tarim ve Hayvancilik Ticaret A.S" компаниясы тендерге катышууда талап кылынуучу сумманын банктык кепилдик документин көрсөткөн эмес", — деп белгилейт Айдаров.
Премьер-министр Жээнбеков Транспорт жана коммуникация министри Замирбек Айдаровго өлкөдөгү жолдорду салууга жана реконструкциялоого, анын ичинде Бишкек — Кара-Балта жолун реконструкциялоого байланыштуу жарыяланган тендерлердин мыйзамдуулугун камсыз кылуу тапшырмасын берди.
