БИШКЕК, 16-июн. — Sputnik. Депутат Дастан Жумабеков Бишкек — Кара-Балта унаа жолун оңдоо боюнча тендерди башкаларга караганда 1 миллиард сом кымбат айткан кытай компаниясы утуп кеткенине нааразы. Бул тууралуу эл өкүлү парламенттин ар кандай маселелер айтылып жаткан учурда билдирди.
Анын айтымында, бул жерде коррупциялык схемалар болушу мүмкүн.
"Мага жеткен маалыматтар боюнча тендер кечээ өтүп, аны эмгегин 70 миллион долларга баалаган кытай компаниясы утуптур. Сынакка катышкандар арасында 54 миллион долларга оңдоп беребиз деген түрк компаниялары бар экен. Эмне үчүн 1 миллиард сомго кымбат баа айткан компания утат? Ал акча бюджеттен кетет да", — деди Жумабеков.
Эл өкүлү аталган маселе боюнча өкмөт башчы Сооронбай Жээнбековго кат жазганын айтып, тез арада териштирүү керек экенин кошумчалады.
