БИШКЕК, 15-июн. — Sputnik. Жогорку Кеңештин жаңы сайты ишке киргенин парламенттин маалымат кызматы билдирди.
Жогорку Кеңештин ишмердүүлүгү тууралуу маалымат kenesh.kg сайтында жеткиликтүү болот.
"Буга чейинки сайт кеч ачылып колдонуучуларга ыңгайсыздык жаратып келген. Мындан сырткары мыйзам долбоорлорун, сүрөт, видео киргизүү көйгөйлүү эле. Буюрса, жаңы сайтта аталган тоскоолдуктар жокко чыкты", — дейт маалымат кызмат.
Мындан сырткары, сентябрь айынан тарта отурумдарды сайт аркылуу онлайн көрсөтүү, онлайн радиону ишке киргизүү пландалууда.
Эске сала кетсек, үстүбүздөгү жылдын март айында ЖКнын сайтын жаңылоо боюнча 300 миң сомго тендер жарыяланып, аны жергиликтүү компания утуп алган. Аталган компания сайтты 250 миң сомго жасады.
