БИШКЕК, 15-июн. — Sputnik. Бүгүн Жогорку Кеңеште депутаттар кызматтык батирден баш тартуу боюнча мыйзам долбооруна каршы пикирлерин билдиришти.
Sputnik Кыргызстан агенттиги бул маалыматты тактоо үчүн Финансы министрлигине кайрылганда мекеменин маалымат кызматы Жогорку Кеңеште кыскартуулар болгондугу тууралуу расмий түрдө документ келбегенин билдирди.
"Депутаттар кызматтык унаадан баш тартышкандыгы тууралуу маалыматты укканбыз. Бирок кыскартуулар боюнча бизге расмий документтер келген эмес. Тагыраагы, кыскартуулар боюнча Жогорку Кеңештин токтому чыгыш керек болчу, биз ошонун негизинде иш аракеттерди жүргүзмөкпүз", — деп билдирди министрликтин маалымат кызматы.
Ал эми Жогорку Кеңештин маалымат кызматынын жетекчиси Ибраим Нуракун уулу үнөмдөлгөн каражатты азыр так айтуу мүмкүн эмес экенин билдирди.
"Үнөмдөлгөн каражаттын так суммасы жыл аягында эсептелип, белгилүү болот. Азырынча так айтуу мүмкүн эмес", — деди ал.
Бул боюнча Бюджет жана финансы комитетинин төрага орун басары Зиядин Жамалдинов аталган маселе келерки жумада комитетте карала тургандыгын айтты.
"Кыскартылган каражаттардын суммасын биз дагы билбей турабыз. Ошондуктан келерки жумада комитеттин отурумуна ЖКнын иш башкармалыгын чакырдык. Алардан толук маалыматты угууну көздөп жатабыз", — деп билдирди Жамалдинов.
Эске салсак, 2015-жылы өткөн парламенттик шайлоодо бир катар партиялар коррупцияга бөгөт коюу, артыкчылыктардан баш тартуу жана мамлекеттик бюджетти үнөмдүү колдонуу багытында иш алып баруу боюнча убадаларын беришкен.
