Күндүн ысышы менен ичеги-карын оорусу көбөйүп, жаш балдар жабыркоодо

БИШКЕК, 13-июн. — Sputnik. 2016-жылдын төрт айында ичеги-карын инфекциясынан жабыркап, ооруканага кайрылгандардын саны 4592 кишини түзгөнүн Саламаттык сактоо министрлиги билдирди.

Оорулардын алдын алуу жана мамлекеттик санитардык эпидемиологиялык көзөмөл департаменти күндүн ысышынан улам микроорганизмдер козголуп, өзгөчө ичеги-карын инфекциясы көбөйө турганын эскертет. Дарттын өсүшү май — сентябрь айларына туура келип, эң көбү август айында катталат. Былтыр 29 705 учур аныкталган. 

Ооругандардын арасында 14 жашка чейинки балдар (84,1 пайыз) көп. Ичеги-карын оорулары менен жабыркагандардын арасында Чүй, Жалал-Абад, Баткен облустары менен Бишкек шаары алдыда. 

Бул дарт негизинен жуулбаган жашылча-жемиштерди жегенден жана жеке гигиенаны сактабагандыктан пайда болот. Андыктан Саламаттык сактоо министрлиги оорунун алдын алуу үчүн төмөндөгүлөрдү эскертет:

1. Жеке гигиенаны сактоо;
2. Ажатканага баргандан кийин колду самындап жуунуу;
3. Балдарга жуулуп, тазаланбаган мөмө-жемиштерди бербөө кажет. Себеби анда ичеги оорусун козгоочу инфекциялар болушу мүмкүн;
4. Тамаш-ашка чымын-чиркейдин конбошун көзөмөлдөө зарыл. Аларды атайын аэрозоль менен өлтүрүү кажет;
5. Тез бузулчу — сүт, каймак, сыр, быштак, салат сыяктуу тамактарды муздаткычка сактоо зарыл;
6. Көчөдөгү тез татым жайларынан тамактарды алууда этият болуу керек.

Андан сырткары, эгер сиз өзүңүздү алсыз сезип, башыңыз ооруп, дене табыңыз көтөрүлүп, кускуңуз келип жатса тез арада дарыгерге кайрылууңуз керектигин Саламаттык сактоо министрлиги эскертет.

Ичеги-карын оорусун козгой турчу инфекциялар топуракта 18 айга чейин, сууда 5 айга чейин жашай алат. Андан сырткары, кашык, тарелка, эшиктин туткасында, жумшак эмеректерде жана оюнчуктарда болушу мүмкүн.