БИШКЕК, 12-июн. — Sputnik. Кайгуул милициясынын башкы башкармалыгы өкмөткө унааларды мажбур эвакуациялоо боюнча токтом долбоорун жөнөттү.
Президент Алмазбек Атамбаев апрель айында унааларды мажбур эвакуациялоо боюнча мыйзамга кол койгон. Ага ылайык, Кыргызстанда "Эвакуатор" деген жаңы жол белги пайда болот. Аны унаа жолдорунун татаал жерлерине, соода борборлорунун жанына орнотуу каралган. Аталган жол белгинин жанынан токтотулган унаа эвакуацияланат.
Буга чейин Кайгуул милициясы бул мыйзамдын иштеши үчүн эвакуациянын жолун так аныктап бере турган өкмөттүн токтом долбоору иштелип чыгышы керектигин билдирген.
Эми долбоор коомдук талкууга коюлду. Эгер премьер-министр ага кол койсо, анда 7 күндүн аралыгында токтом күчүнө кирип, мажбур эвакуациялоону ишке ашыруу башталат.
