БИШКЕК, 7-июн — Sputnik. Казакстандын полиция кызматкерлери Актөбөдө кол салууга катышкан сегиз эркек киши изделип жаткандыгы боюнча маалыматты өлкөнүн булуң-бурчуна чейин таратты. Бул туурасында облустук Ички иштер департаментине таянып Новости-Казахстан кабарлады.
Издөөгө алынгандардын баарынын улуту казак жана Казакстанда туулгандар. Курагы болжол менен 26-33 жашта.
"Кимде ким бул адамдар туурасында кандайдыр бир кабар угуп, билип калса Актөбө облусунун Ички иштер департаментинин 8 (7132) 93-61-00, 93-60-14, 93-60-16 же 102 телефон номерлери аркылуу тез арада билдирүүңүздөрдү өтүнөбүз", — деп айтылат маалыматта.
Жекшемби күнү кечинде белгисиз адамдар Актөбө шаарындагы курал-жарак саткан дүкөндү тоногон. Алар андан ары жолдо кетип бараткан автобусту күч менен токтотуп, аны менен Улуттук Гвардияга барып кол салган. Ал жердеги атышууда алты аскер кызматкери окко учуп, 38 кишиден ашыгы медициналык жардам үчүн кайрылган.
Дүйшөмбү күнү кылмышкерлерди издөө операциясы жүргөн. Анда полиция кызматкерлерине каршылык көрсөткөн беш кылмышкер жок кылынды, дагы экөө кармалганы кабарланган.
Кол салуулардын кесепетинен аскер кызматкерлери менен жай жарандарды алганда 10дон ашуун киши курман болгон. Алардын сырткары, тогуз киши оор абалда ооруканада жатат.
7-июнга карата Актөбөдө 13 террорчу жок кылынган.
