БИШКЕК, 1-июн. — Sputnik. Россия президентинин маалымат катчысы Дмитрий Песков Түркиянын жетекчиси Режеп Тайип Эрдогандын Москва менен эпке келүү боюнча айткан билдирүүсүнө комментарий берди.
Буга чейин Эрдоган Түркия Россия менен мамилелерди жакшыртууга дилгир экенин, бирок ишти эмнеден баштарын билбей жатканын айткан.
Песков башка өлкөнүн башчысына кандайдыр бир кеп-кеңеш берүүгө анын укугу жок экенин, бирок Россия президентинин сөзүн эске салып коё ала турганын билдирди. Анын айтымында, элдешүү үчүн Түркия алгач Россиядан кечирим сурап, каза болгон учкучтун үй-бүлөсүнө жана талкаланган Су-24 учагы үчүн компенсация төлөп берүүсү керек.
"Бул жөнүндө президенттен бери айтып келет", — деди Песков.
Маалымат катчы ушул кезге чейин Түркиядан эч кандай аракеттер болбогонун баса белгиледи.
