БИШКЕК, 1-июн. — Sputnik. Түркия Россия менен болгон мамилесин жакшырткысы келет, бирок Москва түрк тараптан кандай кадамдарды күтүп жатканы түшүнүксүз. Бул тууралуу Түркиянын президенти Режеп Тайип Эрдоган билдирди.
Буга чейин Түркиянын жаңы премьер-министри Бинали Йылдырым Россия менен болгон мамилени жакшыртуу анын иш программасынын негизги пункту экенин билдирген. Ал эми тышкы иштер министри Мевлют Чавушоглу эки тараптын келечегин талкуулаган жумушчу топ түзүүнү сунуштаган.
"Элдешүү үчүн Москва биз тараптан кандай кадамдарды күтүп жатканын түшүнбөй турам. Биз айыпталуучу мамлекет эмеспиз. Россия менен урушууну каалабайбыз. Тескерисинче, биздин өлкө Россия менен мамилесин чыңдагысы келет. Путин экөөбүз дос элек. Ката кетирген же башка нерсе себеп болгон учкуч үчүн Түркия сымал бир чоң мамлекетти курмандыкка чалгандыгы адамды ойго салып койду. Менин оюмча мамилени жакшыртуу үчүн эки тараптуу аракеттер жүргүзүлүшү керек. Бул көйгөйдүн эртерээк чечилишин каалайт элем", — деп маалымат жыйында Эрдоган билдирди.
Владимир Путин Грецияга болгон сапарында Россия Түркия менен болгон мамилесин чыңдагысы келерин билдирген. Бул үчүн ал Анкарадан конкреттүү кадамдарды күтүп жатканын айткан. Анын айтымында, бул жерде сөз кечирим суроо жана талкаланган россиялык учактын чыгымдарын төлөп берүү жөнүндө болуп жатат.
