БИШКЕК, 6-фев. — Sputnik. Түркиянын президенти Режеп Тайип Эрдоган телефон аркылуу Россия өлкө башчысы Владимир Путин менен байланышууга аракет кылып, бирок мындан майнап чыкпай жатканын түрк мамлекет жетекчисинин маалымат катчысы Ибрагим Калын билдирди.
Россия менен Түркиянын ортосундагы мамиле 2015-жылдын 24-ноябрында түркиялык F-16 учагы Сирия аймагынан россиялык Су-24 учагын атып түшүргөндөн кийин кыйла солгундап кеткен. Путин бул аракетти "далыга урулган бычак" деп баалаган. Окуядан кийин Путин Түркияга карата чараларды көрүү боюнча буйрукка кол койгон.
"29-январда Россия дагы бир ирет Түркиянын аба чек арасын бузду. Президент Эрдоган Владимир Путин менен телефон аркылуу байланышууга аракет кылып жатат. Бирок азырынча россиялык тарап жооп бере элек", — деген Калындын сөзүн Anadolu агенттиги келтирет.
Анын айтымында, Сириядагы россиялык күчтөр да, Сириянын өзүнүн аскердик күчтөрү да Түркия менен болгон чек аранын бузулушун каттаган эмес.
