БИШКЕК, 1-июн. — Sputnik. Алмазбек Атамбаев балдарды зомбулуктан эле эмес, терс маалыматтардан да коргоо керектигин Балдарды коргоонун эл аралык күнүнө карата жолдогон куттуктоосунда баса белгилеген.
Ал ошондой эле балдарга татыктуу тарбия, билим берүү сыяктуу эле алардын ден соолугуна камкордук көрүүнүн да мааниси зор экенин айтты.
"Чымыр денелүү, акыл-эстүү жана адептүү баланы тарбиялоо үчүн оору-сыркоолордон, зордук-зомбулуктан эле эмес, азыркы шартта аны психологиялык жана маалыматтык тескери таасирлерден, зыяндуу адаттардан да сактоо керек", — деп айтылат куттуктоодо.
Балдар – биздин бактыбыз, кубанычыбыз, жашообуздун максаты жана маңызы. Бул күнү ар бир ата-эне балдарына мээримин жана сүйүүсүн төккөнгө умтулат. Эң башкысы, бул күн балдар дайыма чоңдордун камкордугу менен коргоосуна муктаж экенин дагы бир жолу биздин эсибизге сала турган күн, деп өлкө башчынын куттуктоосунда айтылат.
"Жашооңордун ар бир мүнөтү жомоктогудай кереметтүү жана шаттуу болсун. Күлкүңөрдүн шыңгыр добушу эч качан өчпөсүн. Акылдуу, чынчыл, адептүү, билимдүү жана мекенчил болгула. "Жаштын тилегин берет" дейт элибиз. Тилегиңер кабыл болсун!", — деп айтылат куттуктоодо.
Президент ошондой эле келечек ээлерине жарык маанай, бекем ден-соолук, тоодой бак-таалай каалады.
