БИШКЕК, 29-май — Sputnik. Иран менен Сауд Аравиясынын сүйлөшүүлөрүнүн "экинчи этабында" аталган өлкөлөр ажылык боюнча бир пикирге келе албай койду. Бул туурасында Ирандын Ажылык иштер менен зыяратчыларды уюштуруу боюнча уюмдун башчысы Саид Оухади айтканын РИА Новости маалымдады.
Буга чейин Эр-Рияд ирандыктардын ажыга келүү боюнча Тегерандын коопсуздук жаатындагы сунуштарына макул болбой койгондугу айтылган. Былтыркы ажылык учурунда Мина өрөөнүндө 464 ирандык зыяратчы каза болгон.
Оухади бул сүйлөшүүлөр "ажыга баруу (Иран жарандары үчүн — ред.) боюнча жасалган акыркы аракет" болорун айткан. Басылмалар эгерде экинчи жолу болгон сүйлөшүүлөр майнап бербесе, Иран өзүнүн жарандары үчүн ажылыкка барууга тыюу саларын жазган.
Оухади IRNA агенттигине эки тарап документте жазылган 11 пункттун ичинен бешөө боюнча бир пикирге келе албай жатышкандыгын билдирди.
Ал маселени чечүүгө акыркы аракет бүгүн болорун айтты.
2015-жылдын 24-сентябрында Курман айт күнү Мина өрөөнүндө чоң шайтанга таш ыргытуу амалдары учурунда зыяратчылар, анын ичинде Иран жарандары да тепсендиде калган. Акыркы маалыматтар боюнча 2200 киши курман болгон. Сауд басылмалары муну "акыркы 25 жыл ичиндеги эң кандуу ажылык" деп атаган.
