БИШКЕК, 25-май — Sputnik. Бишкек шаарындагы №21 мектеп-интернаттын окуучулары келечекте кесип тандоо боюнча керектүү маалыматтарды алышты. Бул тууралуу Билим берүү министрлигинин маалымат кызматы билдирди.
Ага ылайык, 24-майда аталган окуу жайда "Ачык эшик күндөрү" өтүп, ага борбор калаадагы №18 жана №27 кесиптик лицейдин жетекчилери да келген.
Мектеп-интернаттын окуучулары жеңил өнөр-жай (тигүүчүлүк), жыгач жана темир устачылык боюнча кенен маалымат алышты.
Ошондой эле кесиптик окуу жайдын буга чейинки бүтүрүүчүлөрү өздөрүнүн башынан өткөн окуялары менен бөлүшүп, балдарды шыктандырды.
Белгилей кетсек, 2020-жылга чейин билим берүүнү өнүктүрүү стратегиясы иштелип чыгып, анда инклюзивдик билим берүү — мүмкүнчүлүгү чектелген окуучуларга да татыктуу билим берүү моделин өнүктүрүү каралган.
