БИШКЕК, 24-май — Sputnik. Дүйнөлүк шайлоо органдарынын ассоциациясынын өкүлдөрү Кыргызстандын Борбордук шайлоо комиссиясынын жана Чүй облусунун системалык администраторлору менен жолукту. Бул туурасында БШКнын маалымат кызматы билдирди.
Жолугушууда добуштарды автоматтык түрдө санай турган урналарды пайдалануудагы келип чыккан көйгөйлөр тууралуу сөз болду. Андан сырткары, күзүндө жергиликтүү кеңештерге боло турган шайлоонун алдында аталган урналарды колдонуу боюнча атайын окутууларды өткөрүү маселеси талкууланды.
Системалык администраторлор менен БШКнын кызматкерлери бул маселе боюнча өздөрүнүн сунуш, пикирлерин айтышты. Ассоциациянын өкүлдөрү бул маселени аталган уюмдун жетекчилигине жеткирип, жыйынтыгын кийинчерээк билдире тургандыгын айтышты.
Алар бүгүн Баткен, Ош жана Жалал-Абаддын системалык администраторлору менен жолугушуу өткөрөт.
Борбордук шайлоо комиссиясы 27-март күнү өтө турган жергиликтүү шайлоого карата аймактык комиссиялардын мүчөлөрү үчүн атайын окууларды өткөргөн.
