БИШКЕК, 24-май — Sputnik. Эс-тутумдун начарлашы ичеги-карындын иштешине жараша болот. Мындай жыйынтыкка германиялык биологдор келишкенин РИА Новости Cell Reports басылмасына шилтеме берүү менен жарыялады.
Алардын айтымында, узак мөөнөт бою колдонулган антибиотиктер ичегилердеги бактерияларды жок кылат. Ал эми ичеги бактерияларынын жоголушу мээдеги жаңы клеткалардын пайда болушун басаңдатып, эс-тутумду начарлатары белгилүү болгон.
Илимий тажрыйбага окумуштуулар чычкандарды пайдаланып, аларды жети жума бою суу менен багышкан. Сууга антибиотик кошула баштагандан тартып, чычкандардын эс-тутумга жооп берген нерв клеткаларынын саны кыйла азайып кеткен.
Мындай натыйжанын келип чыгышын окумуштуулар ичегилердеги бактериялар борбордук нерв клеткаларына таасир этет деп түшүндүрүштү.
