БИШКЕК, 21-май — Sputnik. Казакстанда административдик жоопкерчиликке 40ка жакын жаран тартылды. Алар 21-майда мыйзамсыз түрдө акция өткөрүүгө аракет жасашкан. Бул тууралуу "Новости-Казакстан" агенттиги башкы прокурордун орун басары Андрей Кравченкого шилтеме берүү менен маалымдады.
"Бүгүнкү күндө жоопко 40ка жакын жаран тартылды. Ал эми социалдык тармактарда 300-500 жаран жазаланды деп айтылып жаткан кептер калп. Полиция кызматкерлери тарабынан акциянын уюштуруучулары гана кармалды. Калган жарандар акцияга катышуу үчүн келишкендиктен аларга чара колдонулган жок", — деп жер маселесин карап жаткан комиссиянын жыйынында Кравченко билдирди.
Анын айтымында, уюштуруучулар митинг өткөрүүгө уруксат берилбегенин билип туруп каршылык акцияны улантышкан.
Мыйзамсыз акцияларды өткөрүү 22-апрелге пландалып, WhatsApр аркылуу чакырыктар жүргүзүлгөн.
Полиция акция өткөрүүнү пландаган уюштуруучулар элге алкоголдук ичимдиктерди берүүнү пландоо менен алданган элди малга салыштырып жазышканын белгилешет.
Аталган фактыга ылайык 5-май күнү полиция Кылмыш жаза кодексинин 24-беренесинин 1-бөлүгү боюнча (маасалык баш аламандык жаратуу) кылмыш ишин козгогон.
Ал эми Урал тургуну, "Абырой" бирикмесинин лидери Жанат Есентаевага карата 16-майда Кылмыш жаза кодексинин 174-беренесинин 1-бөлүгү (улуттук, социалдык, расалык жана дин аралык чатак чыгаруу) боюнча кылмыш иши козголду.
Казак жерлерин чет элдик инвесторлорго 25 жылга ижарага берүү жана аукцион аркылуу жерлерди казактарга сатуу боюнча Жер кодексине киргизилген өзгөртүүлөр карапайым эл арасында чоң нааразычылык жараткан.
Бир катар шаарларда жерди ижарага берүүгө каршы болгон эл митингге чыгышкан. Ал ортодо жерлер чет элдик инвесторлорго сатыла тургандыгы боюнча ушактар дагы тараган.
Мындай нааразычылыкты эске алган президент Нурсултан Назарбаев өзгөртүү киргизилген Жер кодексине 2017-жылга чейин мораторий киргизүү чечимин жарыялады. Ал эми экономика министри Ерболат Досаев менен айыл чарба министри Асылжан Мамытбеков отставкага кетти.
Мамлекет башчысы жерлер чет элдик инвесторлорго сатыла тургандыгы боюнча ушак тараткандарды таап, жазалоо тапшырмасын берди.
Жума күнү Алматынын ички иштер департаменти Алматыдагы "Астана" аянтынан темир таяктар менен күйүүчү каражаттар табылганын билдиришти. Ал эми Алмалы жана Медеу райондорунда жайгашкан эки батирдин ичинен ок атуучу куралдар менен беш миллион теңге табылган. Учурда полиция кызматкерлери күчөтүлгөн мөөнөттө иштеп жатышат.
Караганда облустук полициясы жума күнү кечке жуук жаңы маалымат таратты. Алардын айтымында 21-майда өтө турган митингге чакырык жасаган жарнактарды илип жүргөн жаш бала кармалып, анын сумкасынан диний маанайдагы адабият табылган.
