БИШКЕК, 20-май — Sputnik. Бишкектеги мектептердин биринин бүтүрүүчүсү Россиянын президенти тарабынан берилчү стипендия алгандардын катарына кошулду. Бул туурасында студент Анастасия Ахмедова Sputnik Кыргызстанга кабарлады.
Ахмедова — Бишкек шаарындагы төртүнчү мектептин бүтүрүүчүсү. Ал 2016-17-окуу жылында Россиянын президенти тарабынан бериле турган стипендияга илинген.
Ал Кемеров облусундагы тамак-аш өнөр жайы боюнча техникалык университеттин төртүнчү курсунда окуйт.
Ахмедова учурда 14 500 миң рубль көлөмүндө стипендия алат.
"Учурда окуумду аяктап жатам, буюрса, ушул эле окуу жайдын магистратура бөлүмүнө тапшырам",— деди ал.
Студенттин куратору Анна Позднякова аталган университетте Анастасия менен бирге бюджеттик бөлүмдө дагы бир нече бишкектик балдар-кыздар окуй тургандыгын айтты. Бирок, алар президенттик стипендия алышпайт.
Кемеров облусундагы тамак-аш өнөр жайы боюнча техникалык университет 1972-жылы түптөлгөн жана Россиядагы мыкты 100 жогорку окуу жайдын катарына кирет.
