БИШКЕК, 17-май — Sputnik. Борбор калаадагы Энвер Гареев атындагы ботаникалык бакта "Жашыл Бишкек: Ботаникалык бактын кайра жанданышы" деп аталган фестиваль өтөт. Бул туурасында аталган ботаникалык бактын администрациясы кабарлады.
Ботаникалык бактын администрациясы иш-чаранын максаты — шаардыктардын жашоосу үчүн жашыл бак-дарактардын маанисин айтып берүү, шаарда отургузулган жашыл дүйнөгө элди аяр мамиле кылуусуна чакыруу деп билдирди.
"Бишкекти көптөр жашыл шаар катары билишер эле. Бирок акыркы жылдары мындай көрүнүш улам азайып бара жатканын оңой эле байкоого болот. Биз шаарга жана андагы сейил бактарга, көчөттөрдүн тагдырына кайдыгер эмеспиз жана мурдагы көрүнүштү кайтарууга ынтызарбыз", — деди фестивалдын уюштуруучулары.
Буга чейин мурдагы премьер-министр Темир Сариев Ботаникалык бактын абалы менен таанышып, аны өнүктүрүү боюнча жыйында тиешелүү тараптарга бир катар тапшырмаларды берген.
