БИШКЕК, 11-май — Sputnik. CASA-1000 энергетикалык долбоордун башталыш аземине катыша турган кыргызстандык делегациянын курамы белгилүү болду.
12-майда долбоор расмий түрдө башталып, ал келечекте Кыргызстан, Тажикстан, Афганистан жана Пакистандын электр линиясын бириктирет.
Кыргызстандык делегацияны премьер-министр Сооронбай Жээнбеков жетектейт. Аны менен бирге тышкы иштер министри Эрлан Абдылдаев, чек ара маселеси боюнча атайын өкүл Курбанбай Искандаров, "Улуттук энергетикалык холдинг компаниясы" ишканасынын жетекчиси Айбек Калиев, Мамлекеттик чек ара кызматынын жетекчи орун басары Таалайбек Усубалиев жана өкмөт аппаратынын кызматкерлери барышат. Душанбе шаарынан премьер-министрди Кыргызстандын Тажикстандагы элчиси Мирослав Ниязов тосуп алат.
Бейшемби күнү делегация CASA-1000 энергетикалык долбоорунун курулушу баштала турган Турсунзаде шаарына барат. Мындан тышкары, төрт өлкөнүн делегациялары кыска маек үчүн жолугат. Ушуну менен Жээнбековдун Тажикстанга болгон иш сапары соңуна чыгат.
Эскерте кетсек, CASA-1000 линиясынын узундугу 750 чакырымды түзөт. Биринчи этапта Кыргызстан менен Тажикстандын энергетикалык системаларын бириктирген "Датка — Кожент" линиясы курулат. Андан соң электр өткөрүүчү линиялар Тажикстандан Афганистанга, андан Пакистандын Пешавар шаарына кетет. Долбоорду ишке берүү 2019-2020-жылдарга белгиленген.
