БИШКЕК, 11-май — Sputnik. Бишкектеги сүрөт көргөзмөсүнө Мухаммед пайгамбардын (САВ) кийиминин, Юсуф пайгамбардын селдесинин, Муса пайгамбардын аса таягынын сүрөтү коюлат. Бул тууралуу "Ыйман" фонду билдирди.
Маалыматка ылайык, 2016-жылдын 12-27-май күндөрү Гапар Айтиев атындагы Улуттук көркөм сүрөт музейинде Абазбек Апиевдин "Адамзаттын асыл мурастары" аттуу жеке сүрөт көргөзмөсү өтөт.
Анда сүрөтчүнүн Стамбулдагы "Топ Капы" музейинде сакталган артефактылардын негизинде тартылган 40тан ашуун эмгектери сунушталат. Анын арасында пайгамбарлардын буюмдарынан сырткары Индиядагы чыгыш архитектуралык эстеликтер, көркөм сүрөт өнөрүн чагылдырган эмгектери көрсөтүлөт.
Иш-чаранын максаты кыргыз жарандарын чыгыш маданиятынын архитектуралык эстеликтери менен тааныштыруу болуп саналат.
Апиевдин көргөзмөсү Түркия жана Индияда өткөн. Борбордук Азияда алгачкы жолу өткөрүлүүдө.
