Түркияда Су-24 учагынын учкучун өлтүрүүгө шектелип жаткан согушкер камакка алынды

БИШКЕК, 4-апр. — Sputnik. Түркиянын Батышында орун алган Измир провинциясынын соту россиялык Су-24 учагынын учкучу Олег Пешковду өлтүрдүм деген согушкер Алпарслан Челикти камады. Бул туурасында РИА Новости CNN Turk телеканалына шилтеме берип, маалымат таратты. 

Түрк бийлиги аны Сириядагы террорчулардын катарынан, согуштан кайтып келгенде, шаршемби күнү Измир шаарындагы ресторандардын биринен кармаган. Жанынан Калашников автоматы жана огу менен алты тапанча табылган.

Сурак берүү үчүн ал сотко жекшемби күнү жеткирилген. Челик Су-24 боюнча окуя туурасында "учкуч Пашков парашют менен түшүп келе жатканда башка согушкерлерден атпоону суранганын" айткан. 

Челик куралды мыйзамсыз сактагандыгы үчүн күнөөлөнүп жатат. Согушкер ага тагылган күнөөлөрдү танууда. Аны менен кошо дагы алты киши кармалган. 

Челиктин кармалышы боюнча маалымат Анкарадан Түркиянын президенти Тайып Эрдогандын АКШга жасаган сапарында орус-түрк мамилелерин жандантуу зарылдыгы туурасында айткан учурга тууралап таратылды. Эрдоган мамилелерди аймактык маселелерди чечүү үчүн жакшыртуу зарылдыгын айткан.

Челиктин кармалышы боюнча Россия ТИМинин расмий өкүлү Мария Захарова РФтин тышкы саясат боюнча ведомствосу тарабынан шектелген кишини кармоо себебин билүү иштери жүргүзүлүп жаткандыгын билдирген. 

Россиялык Су-24 учагы Сириянын аймагынан түркиялык F-16 ракетасы менен атып түшүрүлгөн. Экипаждын командири менен штурманы учактан секирип чыгууга үлгүрүшкөн. Командир Олег Пешков согушкерлердин аткылоосунан абада эле өлтүрүлгөн, ал эми штурман Константин Мурахтин Россия жана Сирия аскерлери тарабынан куткарылган.

Россиянын президенти Владимир Путин Түркиянын бул кадамын "далыга урулган бычак" катары сыпаттаган. Бул окуядан кийин Россия менен Түркиянын мамилеси кескин солгундап кеткен.