БИШКЕК, 1-апр. — Sputnik. Түрк бийлиги Сириянын асман мейкиндигинде атып түшүрүлгөн россиялык Су-24 учагынын учкучу Олег Пешковду өлтүрдүм деген согушкер Альпарслан Челикти кармады. Бул туурасында РИА Новости Hurriyet гезитине шилтеме кылып билдирди.
Челик Сириядагы террорчулардын катарынан, согуштан кайтып келгенде, шаршемби күнү Извир шаарындагы ресторандардын биринен кармалган. Анын эмнеге кармалгандыгынын себеби айтыла элек.
Россия ТИМинин расмий өкүлү Мария Захарова РФтин тышкы саясат боюнча ведомствосу шектелген кишинин кармоо себебин билүү иштери жүргүзүлүп жаткандыгын айтты.
"Конкерттүү маалыматтар пайда болору менен комментарий беребиз", — деди Захарова.
Россиянын президенти Владимир Путин Түркиянын бул кадамын "далыга урулган бычак" катары сыпаттаган.
Бул окуядан кийин Россия менен Түркиянын мамилеси кескин солгундап кеткен.
