БИШКЕК, 10-мар. — Sputnik. Стамбул жана Стамбул техникалык университетинин студенттери акция өткөрүп, Түркия атып түшүргөн аскердик Су-24 учагы үчүн кечирим сураган белгилүү түрк акыны Хюсейн Хайдардын ырларынан көркөм окушту.
Акция Стамбулдун борборундагы Таксим аянтында жана Босфор кысыгында өттү. Анда тартылган ролик YouTube сайтына жайгаштырылып, муну менен студенттер кечирим сураган акынга кошулганын билдиришти.
Россиянын Су-24 учагы 2015-жылдын ноябрында Түркия тарабынан Сириянын аймагында атып түшүрүлүп, чек арадан төрт чакырым алыстыкта кулап түшкөн. Анкара Су-24 анын аба мейкиндигин бузган деп күнөөлөгөн. РФтин Башкы штабы учак чек араны кесип өтпөгөнүн белгилеп, бул маалыматты сириялык аба кызматтары ырастап жаткандыгын айтты. Аман калган россиялык учкуч Олег Пешковду сириялык түркмөндөр көзөмөлгө алган аймактагы баскынчылар жерден атып өлтүрүшкөн.
РФтин президенти Владимир Путин муну "далыга сайылган бычак" катары сыпаттаган. Бул окуядан кийин Путин улуттун коопсуздугун камсыз кылуу жана Түркияга карата атайын экономикалык чараларды көрүү боюнча Жарлыкка кол койгон. Курман болгон учкучка "Россиянын Баатыры" наамы ыйгарылган, анын сөөгү 2-декабрда Липецкиде коюлган.
