Былтыр ушул күнү кар жаап… Тилкеден чыккан учак, болбой калган беттеш

БИШКЕК, 30-мар. — Sputnik. Былтыр дал ушул күнү Кыргызстандын көпчүлүк аймактарында, ошондой эле Бишкекте кар жааган.

Кышкы дөңгөлөктөрүн жайкыга алмаштырып алган айдоочулар машинасын айдап чыгуудан тартынышкан. Айрымдары калың кезекке туруп, дөңгөлөктөрүн алмаштырышкан. Бишкек шаарында абанын температурасы түнкүсүн 7…9 градус суук болсо, күндүз 5…7 градус суук болгон.

Бишкек – Ош автожолундагы Төө-Ашууда 29-марттан 30-мартка караган түнү аба ырайынан улам автоунаанын тыгыны пайда болгон. Дал ошол автотыгынга журналисттер да кабылган. Алар ошол убактагы премьер-министр Жоомарт Оторбаевдин катышуусунда түштүктө боло турчу иш чараны чагылдырууга бара жатышкан.

Катаал аба ырайынан улам Ош шаарында аэропортко конуп жаткан учак учуп-конуу тилкесинен чыгып кеткен. Бир да жүргүнчү олуттуу жаракат алган эмес. Ал учакта Кыргызстандын курама командасынын оюнчулары болгону кийин билинген.  

Ошондой эле аба ырайынан улам Афганистандын футболчулары менен болчу жолдоштук беттеш болбой калган. Кыргызстан менен Афганистандын курама командалары Ош шаарында беттешмек.

Бүгүн болсо Бишкек шаарында күн 20…22 градуска чейин ысыса, түнкүсүн 10…11 градус жылуу болот.