БИШКЕК, 26-мар. — Sputnik. Жогорку Кеңештин төрагасы Асылбек Жээнбеков башында турган депутаттардын тобу былтыр 17-ноябрда жер титирөөдөн жапа чеккен Оштун Кара-Суу районунун Чайчы айылынын тургундары менен жолукту. Бул тууралуу парламенттин маалымат кызматы билдирүүдө.
Эскерте кетсек, өткөн жылдын 17-ноябрда түнкү саат 11.30дар чамасында жана түнкү саат 2.00дөр чамасында экинчи жолу жер титиреп, очогу Кара-Суу районундагы Чайчы айылында жайгашканы айтылган. Айылдагы 59 үй текшерүүдөн өтүп, анын ичинен алты турак-жай жарым-жартылай талкаланып, 30 там авариялык абалда экени аныкталган.
Жээнбеков Чайчы айылын калыбына келтирүү багытында жүргүзүлүп жаткан иштер менен таанышып, жергиликтүү тургундар менен баарлашты.
Өкмөттүн Ош облусундагы ыйгарым укуктуу өкүлү Таалайбек Сарыбашов, өзгөчө кырдаалдар министри Кубатбек Боронов Чайчы айылын калыбына келтирүү иштери боюнча эл өкүлдөрүнө кеңири маалымат беришти. Зилзаладан жабыр тарткандарга мамлекет тарабынан өзгөчө көңүл буруп, ар тараптуу колдоо көрсөтүлүп жатканы да белгиленди.
Жолугушуунун жүрүшүндө жергиликтүү тургундар жер титирөөдөн жабыркагандар даражасына жараша ссуда үчүн сертификаттарды алганын айтышты.
"Бизге биринчи кезекте мамлекет тарабынан, башка облустардан, кайрымдуулук фонддордон дагы жардамдар келди", — дешти тургундар.
Алар муну менен бирген турак-жайларды курууга насыя алуунун жол-жобосуна кызыгып, таза суу көйгөйүн көтөрүштү.
Өз кезегинде төрага парламенттин атынан дагы акчалай жардамын тапшырды.
