БИШКЕК, 25-мар. — Sputnik. Оппозиция өкүлдөрү Кубанычбек Кадыров менен Бектур Асанов Улуттук коопсуздук боюнча мамлекеттик комитетте таң атырышканын аталган мекеме билдирди.
Кечээ кечинде УКМК оппозиция өкүлдөрүн буга чейин козголгон кылмыш иштин алкагында суракка чакырганын маалымдаган. Ага ылайык, аталган жарандар Кылмыш жаза кодексинин 27 жана 295-беренесинин негизинде өлкөдөгү абалды дистабилдештирүү жана бийликти күч менен басып алууга шектелүүдө.
Мындан тышкары, Асановдун жакындарынын бири Таалай Мадеминов кечээ кармалгандардын үйүндө тинтүү жүрүп, эч нерсе табылбаганын белгиледи.
Эскерте кетсек, 21-март күнү Интернет айдыңында аудио пайда болуп, анда Кубанычбек Кадыров, Дуулатбек Тургуналиев жана Бектур Асанов болушу мүмкүн делген оппозиционерлер бийликти басып алуу, аймактарда баш аламандык уюштуруу жана акча бөлүштүрүү тууралуу сүйлөшүп жаткандыгы жазылып алынган.
Оппозиция өкүлдөрү сүйлөшүү жазылган видеонун монтаж экенин айтышкан.
