БИШКЕК, 24-мар. — Sputnik. Оппозиция өкүлдөрү Бектур Асанов менен Кубанычбек Кадыровду УКМК кызматкерлери кармап кеткенин Азимбек Бекназаров Sputnik Кыргызстан агенттигине ырастады.
УКМК оппозиция өкүлдөрүн буга чейин козголгон кылмыш иштин алкагында суракка чакырганын маалымдаган. Маалыматка ылайык, аталган жарандар өлкөдөгү абалды дистабилдештирүү жана бийликти күч менен басып алууга шектелүүдө.
Бекназаров Кадыров менен Асановду УКМК кызматкерлери буга чейин жайылып кеткен видео боюнча суракка алуу үчүн алып кетиши мүмкүн экенин айтты. Ал учурда УКМКга жактоочулар жиберилгенин белгиледи.
Эскерте кетсек, 21-март күнү Интернет айдыңында аудио пайда болуп, анда Кубанычбек Кадыров, Дуулатбек Турдуналиев жана Бектур Асанов болушу мүмкүн делген оппозиционерлер бийликти басып алуу, аймактарда баш аламандык уюштуруу жана акча бөлүштүрүү тууралуу сүйлөшүп жаткандыгы жазылып алынган.
Оппозиция өкүлдөрү сүйлөшүү жазылган видеонун монтаж экенин айтышкан.
