БИШКЕК, 23-мар. — Sputnik. Бишкектеги 12-кичирайондо жайгашкан "Ницца" жаңы шаарчасындагы көп кабаттуу үйдө өрт чыкты. Бул тууралуу Sputnik Кыргызстан агенттигине ӨКМ алдындагы өрт коопсуздугу агенттигинин кызматкери Нурлан Ташмамбетов билдирди.
"Бүгүн саат 10.50 чамасында өрт өчүрүү кызматына "Ницца" жаңы шаарчасындагы №35-б көп кабаттуу үйүндө өрт чыккандыгы тууралуу маалымат келип түшкөн. Учурда өрттү өчүрүү иштери жүрүп жатат", − деп билдирди Ташмамбетов.
Анын айтуусунда, төрт кабаттуу үйдүн 3-4-кабаттарын өрт жалмап кеткен. Кырсык болгон жерге үч өрт өчүрүүчү унаалар чыккан. Учурда өрт толугу менен өчө элек.
Өрттүн чыгуу себеби азырынча белгисиз. Ташмамбетов кырсыктан жабыркагандардын бар-жогу тууралуу маалымат түшө электигин кошумчалады.
