БИШКЕК, 21-мар. — Sputnik. Бүгүн кыргыздын классик акыны Алыкул Осмоновдун туулган күнү, анын туулгандыгына 101 жыл толду. Буга карата эртең менен акындар тобу Бишкек шаарындагы "Ала-Арча" көрүстөнүндөгү Алыкул Осмоновдун жайынын башына барып, эскеришти. Бул туурасына Sputnuk Кыргызстан маалымат агенттигине адабиятчы Памирбек Казыбаев билдирди.
"Бүгүн акындар күнү бою өз алдынча топ-топ болуп чогулуп, акынды эскерип ыр окуп, анын чыгармачылыгын эскеришет. Мындай көрүнүш поэзия сүйүүчүлөрүнүн арасында салтка айланып калган", — деп билдирди Казыбаев.
Андан сырткары КТРКнын "Кыргыз радиосунда" Осмоновдун туулган күнүнө жана бүткүл дүйнөлүк поэзия күнүнө карата кечке чейин поэзия боюнча түз эфир болот.
Эфирдин ачылышына акын жана Жогорку Кеңештин депутаты Каныбек Капашов катышып ыр окуду.
"Эфирди ачтык, бул улуу акын Алыкулдун туулган күнүнө жана поэзия күнүнө арналды. Былтыр эфирде бир күн кечке поэзия марафонун уюштурдук эле, быйыл ошону уладык. Бүгүн кечке чейин болот", — деди Иманалиев.
Былтыр кыргыз коомчулугу Алыкул Осмоновдун 100 жылдык юбилейин мамлекеттик деңгээлде белгилеген. Ал эми акындын жүз жылдыгына карата Sputnik Кыргызстан маалымат сайты белгилүү адамдардын көркөм окуусундагы Алыкулдун ырларынан турган роликтер сериясын тартып, ыр кесени жалпыга маалымдоо каражаттарына узаткан.
