БИШКЕК, 14-мар. — Sputnik. Мамлекеттик бажы кызматынын кызматкерлери Кытайдан товар ташып келе жаткан унаанын бажы төлөмүн 25 миллион сомго төмөндөтүп берген фактысы катталганын Башкы прокуратура билдирди.
Маалыматка ылайык, үстүбүздөгү жылдын 2-мартында "Торугарт" чек ара пунктунан "Бишкек Транс Сервистен" бажы документтерин толтуруу шарты менен 16 жүк ташуучу унаа чыккан. Бирок бажычылардын шалаакылыгынан улам унаалар белгиленген маршруттан четтеп кетишкен.
Мында "Торугарт" пунктунан толтурулган документте ишкананын 6 миллион 100 миң сом бажы төлөмүн төлөгөндүгү көрсөтүлгөн. Бирок текшерүү маалында 16 унаада ар кыл товарлар жүктөлүп, бажы төлөмү 31 миллион 490 миң сомду түзөрү аныкталган.
Бул факт боюнча Башкы прокуратура Кылмыш жаза кодексинин 304- беренесинин ""Кызмат абалынан кыянаттык менен пайдалануу"" жана 210-беренесинин ("Бажы төлөмдөрүнөн баш тартуу") негизинде кылмыш ишин козгоду.
Учурда тергөө иштери жүрүп жатат.
