БИШКЕК, 14-мар. — Sputnik. Бишкекке Дагестандан тогуз айлык Симба аттуу арстандын баласы алынып келди. Ал учурда доктурлардын текшерүүсүнөн өтүп жатат. Симбаны көрүүнү каалагандар бир айдан кийин Караколдун зоопаркына барышса болот.
Sputnik Кыргызстан маалымат агенттиги Кыргызстанда кездешпеген жандыктардын кандай түрлөрү өлкө зоопарктарында бар экенин карап көрдү.
Кургакта да, сууда да жашоочу жандыктар
Телодерма бакасы — денеси эңилчек менен капталып, өсүмдүккө окшошуп кетет. Байырлаган жери Вьетнам.
Баджита бакасы — бул жандыкты Парагвай, Аргентина жана Боливиядан гана кездештирүүгө болот. Сууда жашоого ыңгайлашканы менен сүзгөндү билбейт. Суунун тереңдиги 10 сантиметрден ашса, чөгүп кетиши ыктымал.
Ага бакасы — Түштүк жана борбордук Америкада кездешет. Денеси 24 сантиметрге чейин жетип, чоңдугу боюнча экинчи орунда турат.
Сойлоп жүрүүчү жаныбарлар
Калифорниялык падыша жыланы — Калифорния, Орегона жана Вашингтондо кездешет. Ал түстүү, кооз жандык болгондуктан "падыша жыланы" деп аталып калган. Уулуу жылан болгондуктан тиштегенин оңдурбайт.
Жылан моюндуу таш бака — моюну узун болгондуктан, башын ката албайт. Сууда да, кургакта да жашайт. Австралия, Жаңы Гвинея жана Тимордо (Малайя архипелагынын Кичи Зонд аралындагы эң чоң арал) кездешет.
Кыска моюндуу таш бака — Австралияда кездештирүүгө болот. Сууда жашоочу таш бакалардын катарын толуктайт.
Маймылдар
Мармозетка маймылы — Латын Америка аймагында кездешип, эң кичинекей маймыл болуп эсептелет. Чоң курактагысынын салмагы 100 гана граммды түзөт.
Омурткасыз жандыктар
Куба тараканы — эң чоң таракандардын катарын толуктайт. Анын ашказанында бактериялар тамактын бардык түрүн сиңирүүгө жөндөмдүү. Куба аймагында кездешет.
Белгилей кетсек, жогоруда көрсөтүлгөн жаныбарларды Бишкек шаарында жайгашкан менчик зоопарктардан учуратууга болот. Анда жырткыч жаныбарлардын катарын толуктаган арстан менен жолборс дагы бар.
Ал эми Кыргызстандагы жалгыз мамлекеттик зоопарк Ысык-Көлдөгү Караколдо жайгашкан. Анда иштеген кызматкерлер КРде кездешпеген жандыктардын тизмесин берүүдөн баш тартышты. Бирок, Кызыл китепке кирген жаныбарлар зоопаркта бар экенин айтып, тизмесин беришти.
- Тянь-Шань сүлөөсүнү;
- Тянь-Шань аюусу;
- Тоо теке;
- Чүткөр;
- Корсак түлкүсү;
- Япон макакасы;
- Мадыл;
- Пржевальск жылкысы;
- Гуанако ламасы;
- Ак куу;
- Бүркүт;
- Жору.
