БИШКЕК, 9-мар. — Sputnik. Тергөө иштерин улантуу максатында окуя болгон жерге 26-февралда алып келинген учурда качып кеткен Азатбек Алымкулов тынымсыз изделип жатканын Чүй ИИББдин маалымат кызматы билдирди.
Белгилей кетсек, качып кеткен жаран май куюучу жайдын кызматкеринин жарым миллион сомдон ашык акчасын карактаган деп кармалган болчу.
Айыпталуучу жаранды кармоо үчүн ошол күнү эле "Сирена" планы киргизилген.
Чүй ИИББдин маалыматына ылайык, 1989-жылы туулган Азатбек Алымкулов Нарын облусунун Жумгал районунда төрөлгөн. Бишкек шаарында Түштүк-2 кичи районунда №2 үйдүн 42-батиринде жашап келген.
Башкы прокуратура Алымкуловду кайтарган күзөтчүлөр аны менен чогуу ичимдик ичип, кыздар менен саунада эс алышканын маалымдаган.
Кылмышкер менен чогуу эс алган кызматкерлер камакка алынган болчу.
Өзгөчө белгилери: бою 185-190 сантиметр, бети тегерек, чачы кыска. Кызыл түстөгү спорттук кийим, кара шым, кара баш кийим жана кара түстөгү бут кийимчен болгон.
Бул жаран тууралуу кандайдыр бир маалымат билгендер (0312) 36-35-23, же 0(312) 43-01-27, (0701) 655568; 0701655571, 0552 888838 телефондоруна чалса болот.
