БИШКЕК, 1-мар. — Sputnik. Кылмышкердин качуусуна жол берген деген шек менен аны кайтарган күзөтчүлөр 29-мартка чейин камакка алынганын Sputnik Кыргызстан агенттигине Башкы прокуратура билдирди.
Чечимди Аламүдүн районунун соту кабыл алды.
Эскерте кетсек, жума күнү 27 жаштагы соттолуучу Азатбек Алымкулов качып чыккан. Каракчылык боюнча айыпталган жаран Аламүдүн районунда өтүүчү сот процессине алып келген күзөтчүлөрдүн колунан качып кеткен. Буга чейин бир нече ирет кесилген Алымкулов төрт шериги менен май куюучу жайды карактап жарым миллион сомго чукул каражатты алып кетти деп айыпталып келген.
Окуядан кийин Башкы прокуратура Алымкуловду кайтарган күзөтчүлөр аны менен чогуу ичимдик ичип, кыздар менен саунада эс алышканын маалымдаган.
