БИШКЕК, 1-мар. – Sputnik. Унаа жарыштарын уюштуруп, ага катышкандар "Автошылуундук" беренеси боюнча жазага тартыларын Бишкек шаардык жол кайгуул кызматын атайын батальонунун командири Эрлан Атантаев маалымат жыйында билдирди.
Эске сала кетсек, өткөн аптада борбор калаанын Түштүк магистралында унаа жарыштарын өткөрүүгө каршы митинг болгон. Ага чейин, 5-январь күнү автожарыштын кесепетинен бир жаран жабыркап, ооруканадан каза болгон.
Атантаев унаа жарыштары шаар тургундары үчүн өтө кооптуу экенин белгилеп, уюштуруучуларга эскертүү берди.
"Мыйзам Жогорку Кеңеш тарабынан кабыл алынды. Анда унаа жарыштарын уюштуруп, жолду жаап, жарышка катышкандар үч жылга чейин эркинен ажыратылышы каралган. Буга чейин чара көрүүгө мыйзам жол берчү эмес. Эми айдоочулар менен бирге жүргүнчүлөр да айыпка жыгылат", — деди ал.
Жол кайгуул кызматы унаа жарыштары үчүн атайы аянт бөлүп берүү боюнча маселе мэрия менен чечилиши керектигин белгиледи.
