БИШКЕК, 26-фев. — Sputnik. Кыргызстандын Футбол Лигасы Жогорку лиганын катышуучуларын аныктады.
Жума күнү чучу кулак кармалды. Жогорку лигада бардыгы болуп жети команда ойнойт. Биринчи тайпага "Алга" (Бишкек), "Алай" (Ош), "Дордой" (Бишкек), "Абдыш-Ата" клубу (Кант) кирсе, экинчи тайпага "Ала Тоо" (Нарын), "Алдиер" (Куршаб, Өзгөн району) жана "Кара-Балта" ФК (Кара-Балта) кирди.
Чучу кулактын натыйжасында 11-12-мартта өтө турган биринчи турда "Алга" — "Дордой", "Абдыш-Ата" — "Алай", "Ала-Тоо" — "Кара-Балта" командалары беттешмекчи.
Командалар жалпы жонунан 18 тур өткөрөт. Кийинки оюндарда беттеше турган атаандаштар Бергердин таблицасы боюнча аныкталат.
Мындан тышкары, жети команданын баары Кыргызстандын Кубогунун финалдык оюнунан финалдын 1/8 бөлүгүнөн баштап ойнойт. Сегизинчи команда болуп Ош облусунун Кара-Суу районундагы "Исмаил-Ата" тобу кошулат. Бул команда Кыргызстандын экинчи лигасында экинчи орунду ээлесе, "Алдиер" тобу жеңишке жетишип, Жогорку лигада ойноо укугун алган.
Кубок финалынын 1/32 бөлүгү 15-июнда башталат.
